(I) O infanzón acordou comigo desde Nadal unha tregua tal como a que agora me ouviredes: que eu non falase mal da sela nin do brial; mais aquel día mesmo, vede o que fixen, antes de que se afastase unha legua comecei este cantar da egua, que non entrou na tregua, e por iso lle cantarei.
(II) Non nego eu que lle dei tregua ao brial alí, hai tempo, e á sela renxedora; e, sen dúbida tamén entraron nela as mangas do ascarí, mais non a de rabo pequeno: antes de que se afastase unha legua comecei este cantar da egua, que non entrou na tregua, e por iso lle cantarei.
(III) Dei eu tregua entón ao infanzón e ao seu brial, porque ma pedía, e ao outro Zevrón a quen lle renxe a grande sela; mais logo nese mesmo día, antes de que se afastase unha legua comecei este cantar da egua, que non entrou na tregua, e por iso lle cantarei.
(IV) Ao infanzón vilán, famento coma un can, e á sela remendada con canterlas e ao seu brial de Albán deille eu tregua, certamente, e despois de que lla dei, antes de que se afastase unha legua comecei este cantar da egua, que non entrou na tregua, e por iso lle cantarei.