(I) Meus amigos, direivos o que me acontece e como morro por unha dona e non teño remedio; mais non vos direi o seu nome, aínda que vos direi isto: é a máis fermosa que existe no mundo, e, meus amigos, aínda vos direi máis: é plena de todo outro ben.

(II) Por tal dona morro e non lle digo nada de como morro, e como llo hei dicir, pois, se a vexo, tan gran gozo teño de a ver, amigos, que por iso cando a vexo tan fermosa como é e a vexo falar, abofé, contemplándoa perdo a cordura!

(III) Deus fixo esta dona nacer para o meu mal, así Deus me perdoe, e para mal de cantos viven no mundo que viren o seu fermoso rostro, porque lles pasará como me pasa a min, que a amei tanto, des que a vin, que me fai morrer agora por ela.

(IV) Porén, non ouso dicir o nome desta dona, por quen morro, e sabede por que non: porque teño medo no meu corazón, pois morro, de perder, meus amigos, todo o que vos direi: se souber que a amo, ben sei que endexamais me quererá ver!

(1) E, xa que morro amándoa, canto a vir será todo canto (ben) terei diso, xa que outro ben non espero eu conseguir.